Ano lavkeribe e dizutnensar ko nišankeripe o 23 berś thamiribe e komunako Šuto Orizari, ano iklovibe e dizutnen pučajalen? Sijen li čale tar o Teataresko performansi ki khelin tar Teatar Roma.
Disave olendar save đanena so si teatareski khelin vakerena baš olenge impresie tane but bare thaj sine šukar olenge, numa odola tane jek kotor tar publika savendar šaj sakana te dikalen ano asavke Teatareske khelina.
Numa o pobaro kotor tar dizutne khoni asandor vakerena amen khanči na halilem, aso avera samo telarena po šero vakerindor amenge te halova so olenge na sas interesno? Tadani dopherelapes o pučipe? I doš tani ano korkoro manuša so našti te halon ano 21 veko so dikhle ki sasti khelin, ja palem o ačovibe tar nanipe maškar o Roma so nane khelina tar Teatrija, Poezie, tikne dramatizacie, folklori thaj sa o avera so valani te preperen sar muj jeke etnikane kedinake.
Tadani kana ka kedelpes sa akava so anglal vakerdem tadani ka resara ano adava bute beršengo rodipe TRUBUL SIGO E ROMENGE KULTURAKO KHER ANI KOMUNA ŠUTO ORIZARI, Sostar pohari e palunipa ka oven amenge but bare kana i poterni generacija nane te đanel so si Teatar, so si Poezija, Folklor thaj sa o aver. Aso mate vakera kaj odoleja ka anelpes o bistaripe pire Romane kulturako, tradicija thaj so si importatno amari barvali Romani čhib.
Numa nane sa kalo, ko akava dive diklem o Teatarsko performansi ani khelin tar Teatar Roma saveja sine amenge baro hošime so dikhlem ano 15 dakika profesionalcija ani scena, sikavipe jek Evropikano čhane khelipe ani scena thaj dikhlem maškar olende profesionalna emocia saveja denge amen mesažo vakeribnaja -MADARAN ROMALEN AMEN SIJEM ĐIVDE – Jekh dive ka ovel amen amaro Kulturako kher thaj akava tumaro vilesko hošipe ka ikera tumen sakanutne Teatareskere khelinensar.
Roma Press bičalaja mesazo đji amare Romane muja save dena pestar sa ani Teatareski scena o timi tar Teatar Roma te oven ikherimale thaj nikana te na bistren i scena sostar odole bistaripnaja ka bistaren thaj amaro barvalipe Čhib thaj Tradicija.
Hazri kerga: timi Roma Press
