Dikindor o live taro gradonacalniko o Kuco ko leskoro FB profili, puchava ma dali akala amare Roma mangena «preku leb pogacha».
Chudno sorta narodo sijem, niked chaljarde,niked zadovolno bizo razlika dali o neshta tale bare jali tikne.
Sar shaj bistraja 11 bersha avtoritarizimo rezimsko dzividpe, ande anti ustavna odluke prema o Roma.
Zarem shaj li bistraja kana sako dive ano socijalna mrezhe sine objavime kozom Roma iranenalen sine tari granica sal sebepi so si Rom?
Zarem shaj li bistraja kana ki meta sine o socijalcija kastar so chinavge i socijalno parichna pomosh samo odoleske soske nekoj taro lengere pashe manusha bicalge lege love prekal o western union?
Sar shaj bistraja akala bukja kana sine angleder nekobor bersha.
Savi tali odoja grashakoskiri memorija keda but sig bistraja o loshnipa, thaj so posig iranajamen palem ko vreme keda sine amange najbilache, a o shukaripe o progres kola so dikajelen amare jakencar chivajale telako melalo tepiko.
Soske sijem daltonistija pa sa o bukja dikajeln kroz prizma na «parno kalo», ili sijem dobor bare egositioja so samo dikaja sar ka ovel amenge poshukar a javereske sar dela le o Devel agjar.
Soske na meninaja i dioptrija, soske sekogash mora te ova sar o grasta kola sem pravo na smejnena te diken nit levo nit desno?
Soske dobor sig bistraja o sherifsko kaubojsko vreme kana o musklija sine angleder o gjogjaveripa?
Dali amen e Roma taro adala prostorija, a najvishe tari Shutka na sijem sikle te dzivdina ko jek demokratsko slobodno zaednica kote so shaj te negujna o vrednostija e politichko opcijake koja so nudinela amenge pristojno thaj celosno manushikano dostoinstvo?
Trebela li amenge nekoj uvek zhelezno palkaja , te bistrinel amenge demokratsko demagogija , vlechimo taro personalna interesija?
Soske sijem sikle nekoj « Ushi za ushi cigan po cigan..» te ikavelamen ko glasibe?
Savo talo odova psihijatrisko nasvalipe kaske so dzi akana na araklilo iljachi?
Savi tali odoja hemisko reakcija ki lengiri godi , savo talo odova sekreti kova so cirkulirinela ki asavki chuchi lakoverno thaj loki manipulativno godi.
Chache chudno unikatno narodo sijem. Odoleske tapkinaja vekoncar, a ka tapkina palem but bersha angle sa dzi kote akava narodo pokraj o obrazovanie obavezno trebela lenge dlaboka psiholosko analiza em najbitno edukacija, koja tali prioriteti palo ko lengoro obrazovanie.
Te bi shaj sikavela lenge kote lengoro than kola lengere moznostija.
Inaku sa ka dzal u k*rac.
