Akava kurko ake panda aktuleno ko fb thaj sa e socijalna mreze baši o havlaribe savo sas dendo taro Presidenti thaj deputati Makedonijake kedipnaste o tajo Samka Ibraimovski,ki mangin lejbe i pozicija taro ministeri bizo resori Aksel Ahmedovski thaj dejbe šajdipe ki adaja pozicija te ovel nevo đjeno taro PCERM.
Numa o lafi keriba tavdela thaj i ponodorig ko socijalna mreže mangipaja te đjanen pe sostar tani akaja mangin ikalibaske kana penđardi tani i buti taro aktuelno ministeri thaj o but baro pašipe pire presedatele Samka Ibraimovski, jek rig vakerena so si mešime avera riga baši akaja idea, aso avera vakerena kaj akaja tani andrune partijakiri mangin taro PCERM.
O rajo Samka Ibraimovski akava kurko informiringa so isi čačipe ki informacija baši lejbe i funkcija thaj čivibe neve manuše ko akava than.
Numa o špekulacie thaj dezinformacije dive pal dive bajrovena baši anava save tane kandidatija baši akaja pozicija, numa na oficijalno maškar o maj seriozna kandidatija thaj đjene taro PCERM ačovena ko lejbe than akaja pozicija o Muzafer Ismailovski taro Skopje, thaj tano đjeno taro Pcerm taro presedatelstvo thaj o Alan Ismailovski, bute beršengoro aktivisti taro PCERM thaj bukarno sar Konsileskkro đjeno ko MVR, na oficijalno o butederipe taro djenipe taro PCERM isilen mangin te lel akaja pozicija o Alan Ismailovski.
Sar špekulacija sas čivdi o anav tari Nesime Salioska taro Prilep savi vakerga kaj voj nane mešimi pal akaja pozicija thaj partijakoro đjeno nane, aso Enisa Eminova latar nane vahtavi panda tani hemimi pal akaja pozicija jali na.
O vakti ačovela te vakerelpes pal kaste ka bešel o Samka Ibraimovski thaj i aktuelno rađji taro premieri Zoran Zaev.
