Kolumna-Alosaribe (izborija) ka oven ja palem na-DILEMA?

736

Sar so tavdena o bukha dikhovela o baro interes tar o dizutne te đjanen so đjakerela olen pali aktuelno Kovid 19 savo si buvlardo ani sasti lumja (Phuv).

Sar so dikhovena o bukhija naoficijalno  vakerlapes ano maškaripe e čhoneske Maj,  ka đjanelpes kana  o Presidenti e Makedonijako Stevo Pendarovki trubula te ovele panda jekh  liderengo dikhipe te šhaj arakelepes barabutno dive  kana trubul te oven  ikherde e havlarde Alosaribe-Izborija.

Sar so si penđarde o dive ikheribnaske tar Alosaribe anglal te havlarelpes ani Makedonija vodrednikani sostojba trubuja e Alosaribe te ikergoven ano 12 Aprilo.

Numa  dikhindor  i sasti situacija, sar tavdena e bukhija đji resaribe te oven ikherde e Alosaribe dočhivelapes o pučhipe savi ka ovel i pozicija e Romane politikane  partiengi, aktivistija tar pozicija thaj opozicija.  Te čačibnaske nane te ovel iramaliphe tar adala bičaldengere pratenikonge liste save sine penđarde e dizutnenge,  tadani panda akana vakeraja tumenge  but dileme ka oven puterde thaj čačibnaske palpale ka iranelpes interesno politicko aktivizam ani Romani scena-vakerindor interesno filmi ka  ovel prezentirime maškar e Roma, thaj odova ka ovel dikhlo ano sa e thana savende đjivdinena Romano đihani ani Makedonija.

Bash Makedonikani politikani scena, but manuša pučenapes  sas sostar resargapes odoborom ano sigaripe ikheribnaske e Alosaribe, sar so vakerela o Ustavi e Makedonijake  te isi valanipe ikheribnaske  sigarutne, vodrednikane ja palem naplanirime  alosaribe tadani ola trubul te ikergoven maj hari 60 divesenge,  kana ka čhinavelpes i buti tar parlamenti.

Numa te dikaja  thar o sigaripe thaj o itnost tar Makedonikani političko scena tadani dopučajamen  savo itnost kergapes tar Romani politikani scena?  Savi  politikani strategija kurdingapes baš o romano hali e Romengo ani Makedonija? Savo panlo lafi kerge maškar  e naromane politikane bare partie? So phanle pumaro lafi  e aktuelna politička partijaja SDSM? Opozicijake Romane politikane partije  savo phanlo  lafi  ange maškar pumari koalicija  e partijaja VMRO? Khoni  baš akava na kerla lafi  romane vakerdo  ŠTAMA.

Sa akala pučipa dukha anlarela  e dizutnenge  Roma  tar Makedonija,  Sostar? Odolestar  soske tar  akala  pučibna  olenge nikana na sine dendo paluno lafi (odgovor). Tadani na valani te puchenpes sostar  maškar ko roma bajrovela o na pakhavipe ano Romane politikane partie.  Sostar sa akala upre vakerde resarina, anlarena bajrovipe tar pobuter  DILEMA ko  šero e romenge –  thaj  ola pučhenapes soj o sebepi so garavelapes tar roma aso pali odova rodena olendar Hango (glas). E Roma i ponodorig nađjanen so ka đjakerelen  pali akala  vodrednikane,sigarutne, ja palem pali epidemijako Alosaribe  ani Makedonija savenge na oficijalna mere informacie vakerna so trubul te oven  ikherde ano maškaripe e čhoneske Juli.

Numa ačhovela delikantno i situacija tar odova so vakerna e naromane politikane partije ki misal(primer).  O Generalno sekretari tar SDSM Lupčo Nikolovski vakerga amari phuv tani jek ano Sumnal (svet) savi araklagovela tehnikane Rađaja, Parlamenti nafunkcionalno aso araklagovela ani vodrednikani sostojba.

O Telalpresidenti tar VMRO DPMNE,   Aleksandar  Nikolovski  vakerela baš pumaro stavi, Akanasaske na kamena te keren lafi baš Alosaribe sa đjikote tavdela  i ponodorig o aktuelno nasvalipe Kovid 19.

Zoran  Zaev ano peseskere  interjuja nekobor  fori vakerla,  akana nane vakti te kherelpes lafi baš o aktuelna Alosaribe.   Akanasaske amenge tano prioriteti o sastipe e dizutnengoro,  thaj sa đjikote na nakhavelapes i sasti kriza e Koronaja 19 nane te khera lafi  baš Alosaribe.

Uprune duj pasusensar manglem salde te da ko đjandipe e dizutnen  te na ovelolen DILEMA ,  E bare politikane partiengo stavi tano – Sa đjikote  na nakhela i kriza nane lafi keribnaske  baš Alosaribe,  Numa tar aver rig (strana) paralelno e so duj maj bare politikane partie  SDSM thaj VMRO kerena pere hazrlukija  alosaribnaske numa sa adava ani phanli thaj garavdi forma,  ASO  o Romano politikano aktivizam ačhovela vasteja ko muj  bešindor olenge ano šere i DILEMA-KA OVEN, JA PALEM NA E ALOSARIBA(IZBORIJA).

Numa  thaj kana  ka avel o vakti ikheribnaske o vodrednikane Alosaribe ani Makedonija, trubul savore te gndinen ani politikani strategija pučindor  – KA ačhoveli i sostojba e đjivdipnaski e Romengi ani Makedonija jekh sar đji avdive, ODOVA valani te ovel i čačikani  DILEMA? Sakone Romeski ani Makedonija.

( O hramibe preperala prekal  o avtori –kolumnisti thaj oleskoro stavi nanaj phanle  ureduvačko politikaja tar veb.tv portal romapress.mk)

Hramonga (pišinga)

Sevgul Abdula-dip.det.thaj kriminalistika