Erdjan Demir-Kolumna:Tari kula aljam ki nula..

1071

Avdije sijam 26.Juli, datum kovaj tano parumo hor andre ke amare vile, na djanava dali isi nekoj so na djanela so desingjapes angleder 60 bersh ko akava dive. Oja, o baro zemjoter kova so astargja amare dizja Skopje.

Rano sabale ko 05:17 pocmingja te kinanel i phuva, pocmingje te te peren amare khera kerde amare parapapondar, papondar. Sa okova so amare phure vlozingje, sa okova so ola stvoringje, koj pohari koj povishe sa odova pelo, phuv ulo.
Bari duk, nashagjam amare pashen, nashagjem sa okova so sine amen achilem teleder i pravdi havaja, kaj te dja, so te kera, kotar te pocmina?.

Sar o devel naje nikoj dengjamen nevo shajdipe, nekoj dobingje barake, nekoj khera a nekoj smetingepes ko stanja, tare amare tikne khera, amari jek-duj sobe dobingjem neshto pobuter. Tari jek ili duj Romane mahale avdije ki dis Skopje isi isi amen pobuter bendjarde Romane mahale pendzarde ko celo sumnal.

Akana bi mangava sine te kereva jek sporedba e avdisutne Romane politicko situacijaja em sostojbaja ki koja arakljagjovaja amen o roma ko Skopje ki Makedonija. Tari samo nezavisnost akale phuvjake, ko samo lakere pocetokija i amen o Roma sijam delo. Taro avgo parlamentarno sostav sine amen Rom deputati, stalno keraja sine cekorija djajbaja anglal, nekogash povishe nekogash pohari ama djaj sine anglale. Sine amen vaktija koga Romane deputatija sine em ki pozicija em ki opozicija.
Pocmingjem te dobina em javera funkcije/pozicije ki Izvrshno vlast, ko dujto em trito eshaloni. Pocmingje te formirinenpes neve politicko partije razlicno anavencar, strategijaja thaj ideologijaja (samo ko lil).

Pocmingjam o partije te dikalen sar PROFITABILNA organizacije. Osnovingjepes but, upreder od desh pa cak pocmingje em te kinenpes/bikinenpes o partije. Akana nekoj ka phene pa shukar so si bilache ote, djivdinaja ko jek Demokratsko opshtesvo, so bobuter odobor poshukar. No ko realnost o narodo djanena so nane agjhare. Sa akava namesto te anel amenge anglunipe amare narodoske amen irasaliljam but napala. Sa okova so sine amen sa nashagjam isto sar amare khera taro o zemjotres. Akava periodi shaj te phena deka e Romane politika astargja la asavko taksirati, dikljam koj tano koj, dikljam koj kozmi si zuralo, djanlo em javer. Sar so phenena o manusha “Tari kula aljam ki nula”, ka tharel li amen palem o kham, ka delpes li amenge palem shajdipe te vazda amaro shero. Isi amen terne chave, intelektualcija, pherde djandipaja numa te ova iskrena but hari pherde mangipaja kon pi zaednica, pe manusha, po narodo. Te nadinamen deka naje te trebel amen 60 bersh te adjikera za te resa dji negde, te kera diso poshukar amenge amare chavenge amare unukonge.

Pakjava kaj halilem kaj sijem, kozom sijem thaj djanaja so mangaja. Ko vakti kova so avela angli amende ka sikava pobaro nivo djandipe, ka ova pohanle ko jekhipe.

Hramome taro Erdjan Demir.