Ko Skopje -Kurko taro Romane Balija –Sasti Europa ki Makedonija..

291

Anglal avibaske o nevo 2019 berš, aktueliziringapes  o informacie  prekal sa  e Socijalnikane mreže bašh Organizacija  taro ,,Romane Balija“-Nišankeribnaja bare Čalgijensar, Gilavutne thaj hajbe jem pijbe đji ko javinakere arija. Numa  pal sa akava akate hem sikavelapes koj kolestar šaj adale rakake te anel e pošukar thaj po šunde gilavutne thaj bendija.

Amenge sar redakcija akave berš na dikholapes sar  po anglune berša te ovel olen natprevari maškar olende- kaste ka oven misafirija e Politikake prestavnikoja tari Makedonija,  akava berš muklepes savore ko Relahs thaj atmosvera.

Numa i ponodorig ačhovela puterdo  o pučhipe o bare anava tare Makedonijake politikane prestavnikja kaste ka oven misafirija??

I Komuna Šuto Orizari, savi telal olakiri Organizacija ačhovela ki Tradicija svakone Šerutneske savo ka avel ki akaja pozicija te organizirinel ,,Muzikako Bali“. Taro amare na oficijalna informacije akanasaske  vakerelapes  so  sa e karte  bikinime, but hari ačhovela olen te oven astarde sa e thana ko akava bali savo ikergovela ki bari hala Vip Arena ,,Boris Trajkovski,, ko Skopje,  thaj isi gilavutne thaj bendija sar nikana đji akana te na ]jane kas te šune thaj te dikhe, aso sar šerutni atrakcija taro gilavutne anavkerena i penđardi  Srbijaki Čeren Adil thaj panda but avera gilavutne.

I partija SRM  jekhajek anavkerela 40 beršengiri tradicija ko organiziribe spektaklija thaj balija, save vi akava berš telal i organizacija taro SRM, organizirinelapes ,,MuzikakoBali “ thaj jekhajek hajbe thaj pijbe savo ka ovel ikerdo đji javinakere arija ko Hoteli ,,Aleksandar Palas“ sar gilavutni atrakcija akale beršeske o SRM havlarela o avibe Grkijake penđarde gilavutneske Melas thaj avera gilavutne hem bendija.

Sar tradicija e Romane partijenge, jekhajek e asavke balija thaj  muzikake hepeninga ki tradicija vi ačhovela e Romane partijake DSR, save  vi ola akava berš tradiciolno  organizirinena  ,,Muzikaki rakh’  ko Hotel ,,Kontinental“ bare muzikake  gilavutnensar misafirija maj but tari Šutka thaj Bugarija.

Maškar k akala  penđarutne Romane organizatorija ,,Muzikane balenge“ tari komuna Šuto Orizari, nekobor berša tavdela akaja tradicija te nakhel vi ki dis Kumanovo, thaj ko aver fori akavada berš telal vastakeriba e Romane konsileskere prestavnikostar taro Samet S. Akava da berš ko Kumanovo organizirinipe Bal thaj bari Muzikaki programa.

Pal  sa akava anglal so vakergem savorenge ki gnd ko garavde bešela o pučhipe kaste ka oven misafirija e na Romane politikake  učhe pretstavnikja ki Makedonija??

Tadani akava kurko o Roma Pres  mangela šukar nakjibe sa e Organizatorenge taro akala anglala vakerede Muzikane hepeningija te nakhel ki šukar sama,  aso  sa e Romane misafirenge  save avena tari sasti Europa bašhi o ,,Muzikane Balija“ lokho thaj sasto iranipe ko Evropikane puvja.